Emerici Madách

 

Tragoedia Hominis

 

Scaena I

 

 

In excelsis. Dominus gloria circumdatus in sede sua, agmen an­ge­lo­rum genibus nixum, IV archangeli iuxta sedem stant. Splendor maxi­mus videtur.

 

                               CHORUS ANGELORUM

                                               In excelsis Deo sit gloria uni,

                                               Terra et caeli laudent nostrum Deum,

                                               Sunt omnia uno eius prolata verbo,

                                               Fiet nutu eius finis omnium.

                                               Vis est, voluptas, notio ipse tota,

                                               Nostrum est modo umbra, qua nos protegit,

                                               Adoretur pro gratia infinita,

                                               Quod nos consortes lucis prostitit.

                                               Mens sempiterna magna est facta corpus,

                                               Finita est, ecce, iam creatio,

                                               Quibus concessit spiritum, offerunto

                                               Dignum tributum in sacro solio.

                               DOMINUS

                                               Perfectum nunc opus magnum est, ita.

                                               Auctor quievit, mota est machina.

                                               Mille annos milies rotabitur,

                                               Novandus dum sit dens unus rotae.

                                               Cito, custodes mundorum, cito,

                                               Porro infinitos cursus tendite,

                                               Me rursus delectate sub meo

                                               Stridendo praeterlabentes pede.

(Genii stellarum globos sidereos, cometas, nebulas sidereas varia mag­nitudine et colore singula binave volventes ante sedem prae­ter­vo­lant, dum harmonia sphaerarum voce suppressa auditur)

 

                               CHORUS ANGELORUM

                                               Insolens suo nitore

                                               Orbis flammae quam superbe it,

                                               At quibusdam astris modestis,

                                               Invitus quamquam, ipse servit. —

                                               Haec micat pusilla stella,

                                               Lucernam segnem putares,

                                               Ut mundum immensum, colunt sed

                                               Mille milies eam res. —

                                               Invicem luctant duo orbes

                                               Se conferre et semovere:

                                               Hoc certamen est habena,

                                               Qua cursus possunt tenere. —

                                               Ille devolat tonitru,

                                               Territus procul tueris,

                                               Sed sinus mitis beatae est

                                               Myriis vivis quietis. —

                                               Quam modesta est — stella quondam

                                               Est amorem praebitura;

                                               Hanc solacium reservet

                                               Genti humanae cara cura. —

                                               Illic mundi nascituri,

                                               Hic cadentium sepulcra:

                                               Verba quae movent superbos,

                                               Desperantes excitura. —

                                               Ordinem turbans propinquat

                                               Horridâ formâ cometa:

                                               Obliquam viam retorquens

                                               Vox erit Divina meta. —

                                               Care iunior geni, intras

                                               Mundi cum mutabili orbe,

Nunc veste alba, nunc virenti,

                                               Mutato luctu et nitore.

                                               Magno sis beata caelo!

                                               Spe non missa vade, perge;

                                               Hoc pugnatur fine parvo

                                               Magnum cogitante mente.

                                               Risus, fletus, turpe, pulchrum,

                                               Ver hiemsque circuibunt,

                                               Lux et umbra unâ, Deique

                                               Gaudiumque et ira fiunt.

                                               (Genii stellarum agmine exeunt.)

                               ARCHANGELUS GABRIEL

                                               Dimensus infinitum inane

                                               Materiam qui illi indidisti,

                                               Verbo uno magnitudinemque

                                               Distantiamque protulisti:

                                               Osanna, Mens, tibi!

                                               (Procumbit)

                               ARCHANGELUS MICHAEL

                                               Adunans mutabunda semper

                                               Simulque et immutabile usque

                                               Qui infinitumque saeculumque,

                                               Creasti singulos genusque:

                                               Osanna, Vis, tibi!

                                               (Procumbit)

                               ARCHANGELUS RAPHAEL

                                               Appellens carnem ad sentiendum

                                               Beatitudinem profundis,

                                               Prudentiam tuam omnibus qui

                                               Impertiris praebesque mundis:

                                               Osanna, Bonitas!

                                               (Procumbit)

                                               (Pausa)
                               DOMINUS

                                               Tu, Lucifer, stasne insolens, tacens?

                                               An non habes verbum laudi meae?

                                               Forsan quod feci, displicet tibi?

                               LUCIFER

                                               Placeret quid? Diversis praeditae

                                               Nonnullae viribus materiae,

                                               Quas ante quam appererent, forte non

                                               Opinatus vires inesse eras,

                                               Sin sis, illas mutare nil queas,

                                               Permixte fartae in nonnullos globos

                                               Nunc se attrahunt, depellunt atque agunt,

                                               Nonnullis vermibus sensum inferunt,

                                               Dum impleta refrigescant omnia,

                                               Neutrales supersint scoriae. —

                                               Si quando investigarit hoc homo,

                                               Paret sua in fornace denuo. —

                                               Impostum fornaci magnae genus

                                               Humanum spectas miscere omnia

                                               Et experiri, se Deum putans.

                                               Sed devastatis potionibus

                                               Et corruptis te accendet ira sera.

                                               At non perito quid fabro exigis? —

                                               Ad quam rem spectat haec creatio?

                                               Scripsisti carmen ad laudem tuam,

                                               Vilique machinae cum credidisti,

                                               Ad saecla saeclorum non taedium

                                               Te constanter canendi usque afficit.

                                               An tali digna est haec iocatio

                                               Sene, apta vere cordi infantium?

                                               Luto scintilla inflata eri parat

                                               Imaginem non, monstrum fictile;

                                               Fatum, libertas invicem se agunt

                                               Absente sensu concordi arbitro.

DOMINUS

                                               Adorari, haud censeri debeo.

                               LUCIFER

                                               Nil offeram, nisi ipsius meum.

                                               (Angelos digito monstrans)

                                               Hoc agmen vile te laudat satis,

                                               Quibus laudem dignam certe exigis

                                               A te partis, ut umbra a lumine,

                                               Ego sed vivo ab omni tempore.

                               DOMINUS

                                               Procax tu! partus non materia es?

                                               Ubi ante volveras cursum, vim ubi?

                               LUCIFER

                                               A tete idem possum rogare ego.

                               DOMINUS

                                               A tempore infinito comparo,

                                               Quod factum est nunc, et in me vixerat.

                               LUCIFER

                                               Nonne impedimentum quod rerum erat

                                               Cunctorum, sensisti in consilio

                                               Inane, es compulsus creare quo?

                                               En Lucifer, hoc est obstaculum,

                                               Negationis numen pristinum.

                                               Me vicisti, cui est necessitas

                                               Semper dilabi per pugnas meas

                                               Et vi nova rursus consurgere.

                                               Materiam gignente te obtuli

                                               Campos illi, vitae mors adstitit,

                                               Felicitati desperatio,

                                               Et umbra luci, scrupulus spei.

                                               Ubique adsto, quo tu es loco, vide.

                                               Adorem te, qui sic te noverim?

                               DOMINUS

                                               Rebellans spiritus! abes tu, abes.

                                               Possem, at nolo delere funditus

Te: in scoriis lucta abiectus, perosus,

                                               Exul communione spiritûs.

                                               Te solitudinis perpetuo

                                               Dolore torqueat sententia

                                               Cassari incassum carnis vincula,

                                               Vanum bellum pugnari cum Deo.

                               LUCIFER

                                               At non! non me expelles tam leniter,

                                               Ut vilem machinam non iam utilem.

                                               Creavimus consortes: postulo

                                               Sortem meam.

                               DOMINUS (irridens)

                                                                                                              Fiat, velut cupis.

                                               Terram aspice, specta silvas in Eden;

                                               Has celsas arbores in medio

                                               Duas exsecrabo — dein sint tuae.

                               LUCIFER

                                               Parca manu das, sane magnam habes vim.

                                               Sed mi sat est hoc fragmentum soli,

                                               Consistit sicubi negatio,

                                               Ruinam comparat mundo tuo.

                                                                                              (Pergit)

                               CHORUS ANGELORUM

                                               Devote, abes, ne esto coram Deo.

                                               Diiudicanti Osanna Domino.

 

Fordította: Fehér Bence

 

Vissza